Famelabelaran-kevitra
narahina ady hevitra nataon’ny SMM
« Ny
fahaleovantenan’ny Fitsarana ao Madagasikara»
Université Diderot – Paris, 24 jona
2017
Nanararaotra ny fandalovan’ireo mpiandraikitra ambony
ao amin’ny SMM aty Eoropa ny GTT nanasany ny mpiray tanindrazana aty ivelany,
mba hihaona sy hiady hevitra momba ny tsy fisian’ny fahaleaovantena sy ny
aretina mahazo ny tontolon’ny Fitsarana any an-toerana. Marihana fa tsy mitovy
firehana politika daholo ireo no tonga nanatrika. Araka izany dia tsy marina ny
filazana tetsy sy teroa hoe manana endrika na loko politika ity hetsika natao
ity.
Ramatoa Fanirisoa ERNAIVO, Filoha, sy Ramatoa
Felanasoa RANDRIANJAFY, Filoha lefitra, no nifarimbona tamin’ny
famelabelaran-kevitra.
Nanome fanazavana momba ny fipetraky ny fahaleovantenan’ny
fitsarana eo anivon’ny lalàna sy ny rafitra misy ary ny tsy fampiharana izany ireto
mpiandraikitra ao amin’ny SMM ireto. Raha jerena ny toe-draharaha any
an-Tanindrazana, dia tsapa tokoa, hoy ihany izy ireo, ny tsindry sy ny sakana
avy amin’ny fitondrana ka tsy ahafahan’ireo mpitsara miasa malalaka sy araka ny
lalàna.
Tsy mbola tafapetraka tokoa ny fahaleovan-tenan’ny Fitsarana
nohon’ny tsy mbola fitsanganan’ny rafitra voatendry ho antoky ny fisarahan’ny fahefana
isan-karazany (ohatra Haute Cour de Justice izay hiandrasana ny sonian’ny
filoha sisa) na ny fifanoherana eo amin’ny rafitra (ohatra ny « Conseil
Supérieur de la Magistrature » izay misahana ny asan’ny mpitsara nefa
tantanan’ny Filoham-pirenena). Vokatr’izany dia lasa fitaovana politika ny Fitsarana,
ka ny raharahan’ny vahoaka madinika sisa no tsaraina. Anisan’ny toe-javatra
izay mampirongatra ny fitsaram-bahoaka koa izany, satria tsy mipetraka amin’ny
toerany sy tsy misahana ny raharaha tokony ataony intsony ny Fitsarana.
Singany iray ao anatin’ny maro ihany ny « raharaha
Claudine », fa manjaka ny tsy maty manota (impunité) ao an-toerana ary
« hifamono ny Malagasy raha izao no mitohy » hoy ihany izy ireo.
Nilaza koa izy ireo fa misy anjara andraikitry ny
tontolon’ny Fitsarana ny zava-misy ankehitriny, ka izany indrindra no mahatonga
ny SMM, izay niova birao vao haingana, nametraka ny fahaleovantenan’ny Fitsarana
ho tanjona voalohany mba ho antoky ny tany tan-dalàna, ahafahana miady amin’ny
kolikoly ary hizorana mankany amin’ny fandrosoana. Tombotsoan’ny Firenena izany
fa tsy misy ambadika politika. Raha nofinofy izany ho an’ny mpanakiana dia hoy
izy ireo hoe miainga amin’ny nofinofy ny zavatra rehetra ary manana andraikitra
sy anjara biriky ny tsirairay hanatanteraka izany. Ny SMM dia manatanteraka ny azy
ao anatin’izao hetsika izao.
Narahina fifanakalozan-kevitra ny famelabelarana izay
nahazoana valiny mahafapo ary dia isaorana azy ireo ny fampahalalan-kevitra toa
izao
Mbola hitohy any Genève (CH) ny hetsika sy fanentanana
ataon’izy ireo amin’ny Zoma 7 jolay 2017.
Sary:
Aucun commentaire:
Enregistrer un commentaire